Sheeko Gaaban
Dardaaran Waayeel
Wiil yar ayaa awoowgiis ku yiri: Awoowe i bar sirta nolosha iyo sida guusha loo gaaro.
Odaygii in door ah ayuu aamusnaa, waxa uu ku yiri: Hagaag waxaad yeeshaa Xaafadda dhan ku naadi in shelay aan beerta ka helay dahab badan.
Wiilkii sidii buu yeelay, oo xaaffada oo dhan ayuu ogeysiiyay ka dibna awoowgii ayuu u soo laabtay.
Maalinkii saddexaad ayuu ku dhahay xaafadda oo dhan soo ogeysii in xalay Tuug noo soo dhacay oo dahabkii xaday.
Wiilkii sidii buu yeelay wax yar kaddib dadkii oo koox koox u socdo ayaa gurigooda imaadeen ayagoo uga tacsinyeynaya masiibada ku dhacday.
Wiilkii yaraa waa yaabay waxa meesha ka dhacay inkasta uu fahmin.
Odaygii baa ku yiri:Igaarkeey markii aan helay hantida lama filaanka guusha ii soo hoyatay ee aad cid walba u soo sheegtay, qofna nooma imaan farxadda nala wadaagta markii aad maalin ku wargelisay in dahabkii la xadayna waad aragtaa xaafaddii oo aan qofna ka soo harin ayaa iiga tacsiyeysay.
Ma aragtaa farqiga u dhaxeeya labada jeer, dadka ma farax gelineyso inaad guulleysato oo intooda badan waxa ka buuxa xaasidnimo iyo quuri -waa’ markii aad ku wargelisay in wixii la xaday oo aan ka faro marananahay dadku uma imaaneyn kalgacal ee waxa ay hubinayeen in ay dhab tahay iyo in kale si ay jabkeenna ugu sheekeystaan sidaa darteed waxa aan talo kuu siin lahaa qofna ha la wadaagin guushaada iyo waxa aad rabto in aad mustaqbalka qabato .
Guusha aad gaadho Eebbe ku mahadi hana ku kibrin, hays qaad-qaadan hana u malayn in aad dadka wax dheertahay, keliya maanka ku haay in ay tahay deeq Eebbe ku siiyey iyo dheeraad.
Ma ogtahay ninka hantida badan maaha karti uu dadka dheeryahay waase ayaan iyo nasiib Eebbe siiyey, Ninka Ubadka badana waa la mid, midka aqoonta iyo garaadka badana waa la mid
Waxaa jira mid Alla isugu daro saddexda iyo mid saddexdaba ka qatan, Ujeedku maaha in mid Alle si gaar ah u jecelyahay ee mid weliba Imtixaan iyo Jarib ayuu marayaa lagu ogaanayo, Qofnimadiisa xilgudashiisa iyo hufnaantiisa.
Haddii uu kan saboolka ahi ku samro allen ugu mahadiyo ilaahay Jannadiisa ayuu ku abaalmariyaa, sidaas ayuuna ku guuleystaa.
Haddii hantiiluhu, wax bixiyo, Alla ku mahadiyo, hantidiisa jid wanaagsan ku bixiyana, wuu guuleystaa oo Jannada ayaa lagu abaalmariyaa.
Wiilkii ayaa aad ugu guuxay tusaalooyinka awoowgii waanna u Mahad celiyey.
Odaygii baa ku yiri: Waxaa dadka ugu saboolsan ninka waqti haysta ee aan ka faa’iideysan, Ninka caafimaad haysta ee aan ka faa’iideysan, ninka nool ee aan ka faa’iideysan, Ninka dhallinta yar ee aan ka faa’iideysan.
Hantidu keliya maaha xoolo badan ee caafimaadka, waqtiga, nolosha iyo dhallinyaranimaduba waa hanti ee yeysan macno darto kugu dhaafin.
Qormadaan waxa aa ka baran karnaa cashar wax ku qaadasho mudan, mararka qaar ayaad aqristoow qof adiga ana kheyrkaa xiriirinaya kolkaad qalbiga iska tiraa war heedhe yaa umadda oo dhan qofkaan oo kale ka dhigo feejignoow sidaa ma aha arrinku dadka dhan ma aha ceeb ka saliim qaar baa kuu soo booqanaya in ay ogaadaan dhagartii ay kuu maleegeen in aad ku dhacday iyo in kale , qaar baa kuu soo booqanaya sidii ay kuu lug xiri lahaayeen, qaar baa kuu soo booqanaya in ay adiga dhan ku dhaxal seejiyaan oo ceyr faro madopw kaa dhigaan.
Saa maxaa kula gudboon? In la is aammino waa ay fiican tahay waxaase ka sii fiican in aadan ukumahaaga hal danbiil ku ridan il ku daaq ilna ku seexo.
Abka Xaaji qalin-Weyne
