Deriskii Silloonaa
Xaamuud waa xoogsade ku nool maalin goosadka hanti waxa uu leeyahay beer iyo mudul tuulada uga dhisan, noloshiisa waxaa ku wehliso Kaafiso oo ah xaaskiisa.
Sida magaceeda ka muuqata kaafiso waa mid har iyo habeen u heelan dhiisha faqriga in ay tuuraan kuna qanacsan nolosha heerarkeeda.
Kaafiso waa gabar joog iyo jamaal leh oo aad u iimaan badan.
Xaamuud subaxdii beertiisa ayuu ku kalahaa kaafisana barqadii ayey quraac ugu geysaa halkaas ay ku wada cunteeyaan.
Wixii beertaa uga soo go’a ayaa u jiscin ah bar xoolaadna looma oga hase ahaatee nolol farxad bay ku wada noolyihiin.
Bacoor oo deris la ah ayaa ka helay kaafiso waxa uu geed dheer iyo mid gaaban u fuulay sidii uu uga furan lahaa Xaamuud.
Bacoor waa lacagleey ka tilmaaman tuulada beerihiisa shaqaale ayaa uga shaqeeya, Dukaan weyn waxa uu ku leeyahay magaalada waa nin ay ka qasneyn hase ahaatee iskaabulonimo ku gaboobay.
Waa 50 jir aan weligiis guursan, waagii uu dhallinyarada ahaa gacan-geed buu ahaa ka sheegan dhallinta asaagii ah iminkuu da’yahayna kuma sii jirto hase ahaatee Cows geeriyaad uu dabin ugu dhigayo Kaafiso ayuu ku foogan yahay, ma hoydo mana harsado nolosha Xaamuud ee quruxda badan baa u muuqata.
Maalin maalmaha ka mid ah Kaafiso oo ka soo laabatay quraac u geynta ninkeeda ayuu albaabka gurigeeda u istaagay oo ku yiri: Quruxdaada waxaa ka dhimman Gareyskaan iyo garbasaarkaan oo kale waase ka xumahay inuu ninkaaga awoodin laakiin haddaad madax bannaanaan laheyd anaaba ku siin lahaa.
Waxa ay ku tiri duqa shaqo yeelo ninkeyga afaarihiisa ka bax.
Kaafiso markii ay iska yureysay ka dib ayaa wax qub ku dhaheyn saa habeenkii isbaddal buu ka gartay Xaamuud markii uu weyddiiyay waxa ay u sheegtay in ay u baahan tahay Maryo cusub kuweediina ay duugoobeen.
Xaamuud subaxnimadiiba dukaan tuulada ku yaalay buu deyn uga soo qaaday waa dukaanka Bacoor, Bacoorna ogaal buu u soo siiyay si uu u khaameeyo deedna, Xaamuud na Xaaskiisa ayuu farta ka saaray.
Bacoor oo farsamadii hore u shaqeyn weyday wuxuu keenay maalinki xigtay set dahab ah asagoo ku yiri Inbaay dhar cusub waa heshay laakiin nasiibdaro quruxdaada waxaa ka maqan kaad qoorta suran laheyd iyo kuwaad dhagaha suran laheyd oo dahab ah sida
Naagaha kale la qabo u heystaan waana tusiyay asagoo u raaciyay haddaad madax bannaan laheyd kuwaan baan kugu sharfi lahaa.
Sidii oo kale waa iska yureysay oo weliba ku canaanatay inuu afaaraha xaasaska ka baxo, hase ahaatee markii ay gurigeeda gashay waxaa ka hor muuqday Dahabkii.
Xaamuud waa nin xaaskiisa ka warqabo waqti badan kuma qaadan inuu ogaado caajiskeeda meesha uu daaran yahay.
Markii ay warka uga tibixsiisay ayuu ku yiri: Waa tuma naagta aad la saaxiibtay ee howl adduunyo kugu mashquulisay sow ma ogid tabarteena iyo in aan hadda qaameysanahay?
Waxa ay ku tiri: Naag beel kuma dhahee waa ninka deriskeena ee Bacoor oo waayahaan ba burush olyo leh jidka iila taagnaa weliba waxa uu ii sheegay haddaad i furto inuu asagoo i guursan set kaa i siin doono.
Xaamuud waagaa ku baryay garay in la galay oo godkiisii biyo ugu soo galeen.
Subaxnimadii ayuu walaalkii oo tuulo ku dhow deganaa u tegay si uu uga caawiyo deyn iyo deeq…
La soco qeybaha xiga
Abka Xaaji Qalinweyne
Ab-Toosane
